५ वैशाख, काठमाण्डौं । टेलिभिजनमा कार्यक्रम सञ्चालिका (भिजे) बन्ने प्रलोभनमा परेकी एक युवती बलात्कारबाट बल्लतल्ल जोगिएकी छिन् । टेलिभिजनको जागिरका लागि अन्तर्वार्ता दिने नाममा होटलमा बोलाएर युवतीमाथि बलात्कार प्रयास गर्ने युवक पक्राउ परेका छन् ।
एक अंग्रेजी दैनिकमा भिजे चाहिएको विज्ञापन हेरेपछि सोनी महर्जन (नाम परिर्वतन) लाई टेलिभिजनमा काम गरेर एकाएक चर्चित हुने रहर जाग्यो । त्रिपुरेश्वरस्थित ब्लु बर्ड मलमा कार्यरत उनका लागि टेलिभिजन कार्यक्रम चलाउनु निक्कै ठूलो सपना थियो । तर, त्यही सपनाको पछि लाग्दा उनी ठगको फन्दामा परेकी हुन् । अन्तर्वार्ताका लागि बोलाएर मकवानपुरका पुष्कर खड्काले महर्जनलाई बलात्कार प्रयास गरेका हुन् । उनले युवतीको मोबाइलसमेत लुटेका छन् ।
खड्का हाल प्रहरी हिरासतमा छन् ।
घटना माघ १९ को हो । पत्रिकामा विज्ञापन देखेपछि महर्जनले खड्काको मोबाइलमा फोन गरेकी थिइन् । सामान्य कुराकानीपछि खड्काले उनलाई अन्तर्वाताका लागि सुन्धारास्थित सिभिल मलमा बोलाएका थिए । सिभिल मलमा पुगी महर्जनले फोन गरिन् । तर खड्काले नजिकैको राप्ती गेस्टहाउसमा बोलाए ।
टेलिभिजन कार्यक्रम प्रस्तोता बन्ने लालतामा आफ्नो बायोडाटासमेत बोकेर उनी अड्का बसेको कोठामा पुगिन् । ‘कोठामा पुग्ने बित्तिकै हतार हतार चुकुल लगाए,’ पीडित युवतीले प्रहरीमा दिएको जाहेरीमा भनिएको छ, ‘पछि फोटो खिच्न भन्दै उनले कपडा फेर्न लगाए, त्यही वेला जबर्जस्तीको प्रयास गरे ।’
पीडितका अनुसार आफूलाई निकै मन परेको र मासिक १५ हजार तलबसहितको जागिर दिने आश्वासन दिँदै खड्काले शारीरिक सम्बन्ध राख्ने प्रयास गरेका थिए ।
युवतीले शारीरिक सम्बन्ध राख्न अस्वीकार गरेपछि उनले खल्तीबाट चक्कु निकाली धम्क्याएका थिए । पछि हात र मुखमा टेप लगाई उनले दुव्र्यवहार गरेका थिए । युवतीले प्रतिकार गरेपछि उनको मोबाइलसमेत लिएर खड्का गेस्टहाउसको ढोकामा बाहिरबाट ताला लगाएर फरार भएको प्रहरीले जनाएको छ । युवतीले हारगुहार गरेर ढोका खोली प्रहरीलाई खबर गरेकी थिइन् ।
घटनाको दुई महिनापछि अभियुक्त खड्कालाई प्रहरीले पक्राउ गरेको खबर नयाँ पत्रिका दैनिकले छापेको छ । खड्कालाई महानगरीय प्रहरी परिसर काठमाण्डौंले अपहरण तथगा शरीर बन्धक मुद्दामा अदातलबाट म्याद थप गरी कारबाही अघि बढाएको छ ।
पक्राउ परेका युवकले आफूलाई एक निजी टेलिभिजनका लागि भिजे छान्न पोखराबाट काठमाण्डौंसम्म आएको भन्दै विभिन्न युवतीलाई भेटेका थिए । अन्य युवतीलाई समेत उनले त्यस्तै दुव्र्यवहार गरेको हुनसक्ने प्रहरीले आशंका गरेको छ ।
|
|
