२२ चैत, म्याग् । विद्यालय जाने क्रममा एक बालिका बलात्कृत भएकी छिन् । भगवती गाविसकी बालिका स्थानीयवासी १५ वर्षीय किशोरबाट बलात्कृत भएकी हुन् । आफन्तको संरक्षकत्वमा पीडित बालिकाले बुधबार जिल्ला प्रहरी कार्यालयमा दिएको जाहेरीअनुसार यही चैत ९ गते बिहान विद्यालय जाने क्रममा पीडकको घरमा उनी बलात्कृत भएकी थिइन् ।
आमा मामाघर गएकी र घरमा सानीमासँग बस्दै आएकी बालिकाले आमा घरमा फर्केपछि चैत १९ गते घटना सार्वजनिक गरेकी हुन् ।
“म स्कुल जान हिँडेकी थिएँ, उसको घरछेउ पुगेपछि मिठाइ खान आऊ भन्यो र म गएँ, मिठाइ दिएपछि घरभित्र लग्यो” प्रहरी जाहेरीमा उल्लेख छ ।
घटनाको अनुसन्धान गरी जिल्ला अदालतमा मुद्दा दायर गरिएको जिल्ला प्रहरी कार्यालयका प्रहरी नायब निरीक्षक डिलिम्बरराज घिमिरेले बताए। पीडकलाई पनि पक्राउ गरिएको भए पनि उमेर कम भएकाले नाम सार्वजनिक नगरिएको उनले बताए । गत महिना पनि बेनीको एक घरमा डेरा गरी बस्ने बालिका छिमेकी कोठामा बस्ने अर्का बालकबाट बलात्कृत भएकी थिइन् । रासस
|
|
