नेपाली सिनेमाले उद्योगको मान्यता पाउन सकेको छैन । तर पनि यहाँ बर्षेनी लगानीको दर बढिरहेको छ । यो बर्ष नेपाली सिनेमामा ४६ करोड लगानी भएको वितरक सुनिल मानन्धर बताउछन् ।यो बर्ष गत बर्षलाई चुनौती दिदै ११५ वटा सिनेमा प्रदर्शनमा आउने पक्का भएको छ । शुक्रबार प्रदर्शनमा आउने ‘नोटबुक’ र ‘हमेशा’ सँगै यो बर्ष ११५ सिनेमा प्रदर्शनमा आउनेछन् । तर प्रदर्शनमा आएका सिनेमाको आम्दानी हेर्ने हो भने दुख लाग्दो छ ।
यो बर्ष प्रदर्शनमा आएका कुनै पनि सिनेमाले निर्मातालाई खुशी बनाएनन् । तर ‘सायद’, ‘अपवाद’, ‘मातलीको भट्टी’, ‘विन्दास’, ‘किन लाग्छ माया’ र ‘रिदम’ ले निर्मातालाई बचाएका छन् । वितरक मानन्धर भन्छन्, ‘यि सिनेमाले पनि आफ्नो लगानी सुरक्षित मात्र गरेका हुन्, कमाएका होइनन् ।’
गतबर्ष नेपाली सिने बजारमा ८७ वटा सिनेमा प्रदर्शनमा आएका थिए । तर व्यापारिक रुपमा शुन्य जस्तै भएपनि सिनेमा निर्माणको क्रम झनै बढ्नु आफैमा अचम्म लाग्दो कुरा छ । ४६ करोडको लगानी यो बर्ष पनि बालुवामा पानी खन्याय जस्तै भएको छ ।
किनकी, अधिकांश सिनेमाले मुश्किलले १० लाख पनि कमाउन नसकेको आँकडा बाहिर आएको छ । तर वि.सं २०७० मा यो सिनेमा निर्माणको क्रम घट्नुको साटो बढ्ने देखिएको छ । सिनेमा निर्माण र घोषणको प्रक्रिया हेर्ने हो भने बर्ष २०७० मा पनि नेपाली सिनेमाको प्रदर्शनमा बाढी आउने पक्का देखिन्छ ।|
|
