२६ चैत, काठमाण्डौं । अन्तरिम चुनावी मन्त्रिपरिषदले निजामति कर्मचारीको सेवा सुविधामा उल्लेख्य वृद्धि गर्ने योजना अघि बढाएको छ । चैत मसान्तभित्र ल्याउन लागिएको बजेटमार्फत कर्मचारीको सेवा सुविधामा उल्लेख्य वृद्धि गर्ने योजना सरकारले बनाएको हो ।
‘राष्ट्र सेवक कर्मचारीको तलब, भत्ता, सेवा सुविधा तथा नियमित खर्चका लागि बजेटमा भारी वृद्धि गर्ने अन्तिम तयारी भरहेको छ, यसपटक बजेटमा कर्मचारीले राहत महसुस गर्नेछन्,’ अर्थमन्त्रालय बजेट महाशाखाका एक अधिकारीले भने, राजधानी दैनिकमा खबर छ । बजेट निर्माणमा सहभागी ती अधिकारीका अनुसार सरकारमा सहभागी मन्त्रीहरु नै निजामती सेवाको विशिष्ट श्रेणीमा रहेकाले यसबेला कर्मचारीलाई मनोबल उकास्न सेवा सुविधा बढाउन लागिएको हो । उनले करिब ४ सय अर्ब बजेट ल्याउने तयारी भइरहेको पनि जानकारी दिएका छन् ।
अर्थमन्त्री शंकर कोइरालाले समेत केही दिनअघि नै चैत मसान्तभित्र बजेट ल्याउने जानकारी दिएका थिए ।
विगतमा राजनीतिक असहमतिका कारण पूर्ण बजेट ल्याउन नसकेको कारण देखाई प्रधानन्यायाधीश खिलराज रेग्मीको नेतृत्वका गठन भएको सरकारले आफ्नो पहिलो महिनामै बजेट ल्याउन लागेको हो । सोही आधारमा अर्थ मन्त्रालयमा अहिले बजेट निर्माण कार्य अन्तिम चरणमा पुगेको छ । ‘बजेट निर्माण कार्य लगभग अन्तिम चरणमा पुगिसकेको छ, चैत मसान्तभित्रै आउँछ,’ अर्थसचिव शान्तराज सुवेदीले भने ।
बजेटमा राजस्वको दरमा हेरफेर नगरिने तथा एकसय २० अर्बको वैदेशिक सहायता लक्ष्य राखिएको मन्त्रालयले जनाएको छ । साथै विकास खर्चका लागि करिब ७० अर्ब रकम विनियोजन गरिनेछ ।
|
|
