१६ चैत, काठमाडौं । केन्द्रीय समितिलाई पूर्णता दिने समय नजिकिँदै जाँदा एकीकृत नेकपा माओवादीभित्र उपाध्यक्ष र सचिव पदका दाबेदारहरुको संख्या बढ्न थालेको छ । ३ सय ९९ सदस्यीय केन्द्रीय समितिमा दुईभन्दा बढी सचिव रहने विधानमा व्यवस्था छ । शनिबार बस्ने बैठकले पदाधिकारी र केन्द्रीय सदस्यहरुको टुंगो लगाउने एमाओवादीले जनाएको छ । हेटौडा महाधिवेशनपूर्व पार्टी फुट्नुअघिको केन्द्रीय समितिमा सीपी गजुरेल र पोष्टबहादुर बोगटी सचिव हुनुहन्थ्यो । गजुरेल वैद्यपक्षमा लागिसक्नुभएको छ भने बोगटी महाधिवेशनबाट महासचिव बन्नुभएको छ । त्यसैगरी पहिले ३ जना उपाध्यक्ष रहेकोमा वैद्यको ठाउँ अहिले पनि खाली रहेको छ । पदाधिकारीलाई पूर्णता दिनका लागि अब एमाओवादीले घटीमा एक उपाध्यक्ष र तीनभन्दा बढी सचिवहरुको मनोनयन गर्न बाँकी छ ।
स्रोतअनुसार बरियताको हिसावले एमाओवादीमा अमिक शेरचन उपाध्यक्षका दाबेदार हुन् भने कृष्णबहादुर महरा, गिरिराजमणि पोखरेल, टोपबहादुर रायमाझी र वर्षमान पुन सचिवका दाबेदार हुन् । लीलामणि पोखरेलसमेत पदाधिकारीका दाबेदार भए पनि बरियतामा उनीभन्दा अघि चारजना नेता रहेकाले पोखरेल दौडमा पछाडि छन् । मधेसी नेताहरुले एक जना सचिव मागेका छन् । मधेसी कोटाबाट सचिव बनाउने स्थितिआए प्रचण्ड निकट पूर्व एकता केन्द्रका नेता विश्वनाथ शाह त्यसका दावेदार हुन् । पदाधिकारीका दाबेदारमध्ये पाँचैजना अध्यक्ष प्रचण्डका भरपर्दा सारथी होइनन् । एकताकेन्द्रबाट आएका अमिक शेरचन आफैं प्रचण्डको नभई अलग्गै गुटका नेता हुन् ।
सचिवका दाबेदार महरा विगतमा प्रचण्डका विश्वासपात्रका रुपमा रहे पनि वैद्य र प्रचण्डलाई मिलाउने भन्दै मध्यमार्गी धारको नेता बनेपछि कतिपयले उनलाई वैद्यनिकट भएको र विप्लवसँग भित्री साँठगाँठ रहेको आरोप लगाउने गरेका छन् ।
एकताकेन्द्रबाटै आएका गिरिराजमणि पोखरेल नारायणकाजी श्रेष्ठका दाहिने हात भएकाले उनी पनि प्रचण्डका विश्वासपात्र होइनन् । सचिवका अर्का दाबेदार टोपबहादुर रायमाझी त झनै डा. बाबुराम पक्षमा खुलेरै लागेकाले उनीबाट प्रचण्डलाई भर हुने स्थिति छैन । शेरचनदेखि वर्षमानसम्मको टीमलाई हेर्दा प्रचण्ड नयाँ बन्ने पदाधिकारी कमिटीमा प्रचण्ड कुनै पनि बेला अल्पमतमा पर्नसक्ने स्थिति देखन्छि । तीन उपाध्यक्ष र तीन सचिवमात्रै बनाइयो र बरियतालाई आधार मानियो भने वर्षमान पुन छुट्न सक्छन् । यो अवस्थामा प्रचण्डको पक्षमा उनी आफू र बोगटीमात्रै रहने स्थिति छ ।
विगतमा पार्टी फुट्नुअघि वैद्य र भट्टराईपक्ष मिल्दा पदाधिकारीमा प्रचण्ड अल्पमतमा परेका थिए ।
वैद्य, बाबुराम, वादल र सीपी गजुरेल एकातिर लाग्दा प्रचण्डको पक्षमा उनी, नारायणकाजी र पोष्टबहादुर बोगटीमात्रै थिए । गुरुलाई उछिन्ने चेलाको दाऊ धेरैजना सिनियरहरुलाई पछि पार्दै प्रचण्डद्वारा नेतृत्वमा तानिएका पूर्वअर्थमन्त्री वर्षमान पुन अनन्त बरिष्तामा कनिष्ठ भए पनि सबैभन्दा बरिष्ठ सचिव बन्ने दौडमा लागेको एमाओवादी स्रोत बताउँछ । यसक्रममा आफ्नै गुरु कृष्णबहादुर महरालाई भन्दा आफूलाई अगाडि राख्नुपर्ने भन्दै अनन्तले महत्वाकांक्षा प्रकट गर्न थालेको एमाओवादी नेताहरुको आरोप छ । महाधिवेशनमा महासचिव र हाल सचिवको दौडमा रहेका कृष्णबहादुर महरा र सचिवका दाबेदार वर्षमान गुरु र चेला हुन् । रोल्पामा शिक्षक हुँदा महराले पढाएका अनन्त आफ्ना गुरुलाई उछिनेर बरिष्ठ सचिव बन्ने होडमा लागे पनि पछिल्लो समयमा प्रचण्डले उनीप्रति कम भर गर्न थालेको स्रोत बताउँछ ।
|
|
