१९ माघ, उदयपुर । केटीसाथीलाई प्रेमपत्र लेखेको निहुँमा एक किशोरले सिस्नुपानी भेटेका छन् । ताम्लिछाका १५ बर्षका रामचन्द्र कार्कीले आफ्नै सहपाठीलाई मन पराउँदा यस्तो सजाय भोग्नुपरेको हो । कार्कीलाई सँगै पढ्ने केटीसाथीका बाबु कृष्ण निरौलाले नांगै बनाएर सिनोपानीले हानेका थिए । दाजु नीराजनले भाईको शरीरभरि चोट लागेको बताए । रामचन्द्रलाई कुट्ने निरौला स्थानीय एमाओवादी नेतासमेत हुन् । स्थानीय विद्यालयको कक्षा १०मा अध्ययनरत रामचन्द्रले आफूसँगै पढ्ने एक किशोरी मन पराउँदै आएका थिए । उनले सुरुमा मौखिक प्रस्ताव राखेपनि किशोरीले कुनै जवाफ दिएकी थिइनन् । अन्ततः रामचन्द्रले प्रेम पत्र नै लेखेर मन जित्ने प्रयास गरेका थिए । उनले सो पत्र साथी मार्फत किशोरीलाई पठाएका थिए । किशोरीले पनि सहर्ष स्वीकार गरेर घर लगेकी थिइन् तर, कुनै जवाफ भने पठाएकी थिइनन् ।
