नेपाली कलाकार फेरी रंगशालामा दौडने

विभिन्न नाम दिएर आयोजना हुने फुटबल प्रतियोगितमा नेपाली कलाकारहरुले आफ्नो उपस्थिती जनाइसकेका छन् । छायांकनबाट फुर्सद लिएर नेपाली कलाकारहरु फुटबल खेल्न काठमाण्डौको दशरथ रंगशालामा कहिलेकाही उत्रने गर्छन् । यस्तै मौका पुन एकपटक मिल्ने भएको छ । नेपाल चलचित्र कलाकार संघ र नेपाल विज्ञापन एजेन्सी संघ (आन) को संयुक्त आयोजनामा फुटबल खेल हुने भएका हो । फागुन महिनामा आयोजना हुन लागेको फुटबल प्रतियोगीताको बारेमा ‘आन’ र कलाकार संघबिच संझौता समेत भैसकेको छ । फुटबल खेलमा नेपाली सिनेमाका चर्चित कलाकारहरुको उपस्थिती हुनेछ । नायक राजेश हमाल, रेखा थापा, करिश्मा मानन्धर, आर्यन सिग्देल लगायतका चर्चित अनुहारहरु जर्सीमा फुटबल खेल्न रंगशालामा उत्रने छन् । कलाकार संघको सक्रियता बढाउन र भाइचारको सम्बन्ध विस्तार गर्न फुटबल खेल आयोजना गर्न लागिएको संघका अध्यक्ष नबल खड्काले बताएका छन् । यस्तै उनले नेपाली टेलिभिजनमा देखाइने विज्ञापनमा नेपाली कलाकारलाई खेलाउने बिषयमा समेत कुरा भैरहेको बताए । फुटबल खेलले विज्ञापनमा नेपाली कलाकारको सक्रियतालाई समेत फाइदा पुग्ने उनको भनाई छ ।