दाइँ गर्न नसक्ने बोकाको के काम: केपी शर्मा ओली

दमक, असोज २१ । नेकपा एमालेका स्थायी समिति सदस्य केपी शर्मा ओलीले पार्टी एकता देख्न नचाहने तत्वले पार्टी भित्रका केही मान्छेलाई उक्साई पार्टी परित्याग गर्न बाध्य बनाएको बताएका छन् । आज बिहान झापाको दमकमा प्रेस चौतारी झापाले गरेको अन्तरकृयामा बोल्दै ओलीले एकीकृत नेकपा माओवादीले एमालेका कर्मठ नेताहरुलाई उक्साएर परित्याग गर्न बाध्य बनाएको बताएका हुन् । उनले एमालेका कारण पहिचान बनाएका नेताहरुले पहिचान खोज्दै हिँड्नु मुर्खता भएको टिप्पणीसमेत गरे ।
ओलीले पार्टीको विभाजन नभइ केहीले परित्याग मात्र गरेको उल्लेख गर्दै एकीकृत नेकपा माओवादीले एमालेभित्र खेल्न खोजेको टिप्पणी गरे ।
सरकार र सत्ताको बलमा अराजकता र भ्रष्टाचारलाई प्रश्रय दिँदै गरेको बाबुराम भट्टराईको सरकार दशैंपछाडि ढल्ने समेत उनले ठोकुवा गरे ।

पत्रकारको एक प्रश्नको जवाफमा ओलीले भने, ‘यदि कसैले तानाशाही लाद्ने सपना देख्छ भने त्यसलाई एमालेले कर्‍याककुरूक पारेर फालिदिनेछ ।’ संविधान बनाउने कुरा र अन्य समस्या समाधान गर्ने कुरामा भट्टराई सरकार असफल रहेको बताउँदै भने, ‘बोका नारेर हेर्दा पनि दाइँ हुन नसकेपछि बोका नारिरहुनुको कुनै अर्थ छै ।’
सहमतिका लागि बारम्बारको पहल हुँदासमेत एकीकृत माओवादी गम्भीर नभएको आरोपसमेत ओलीले लगाए ।
अबको सहमतिको सरकारका लागि नेकपा एमालेले कृयाशिलता देखाएपनि कांग्रेस भित्रको बिवादका कारण एमालेले सरकारको नेतृत्व गर्नुपर्ने अवस्था आए सरकार राम्रोसँग चलाएर देखाइदिने चुनौती समेत ओलीले दिनुभयो ।
सरकारको नेतृत्वको एकीकृत माओवादी बाहेककको बनाइने बताउँदै उनले त्यसका लागि एमालेले सबै पार्टीसँग समन्वय गर्ने बताए ।
अबको चुनावी सरकारले संविधान सभाको निर्वाचन गर्ने भएका कारण सहमतिविना निर्वाचन हुन नसक्ने उनको भनाइ थियो ।Source:पुर्बेली टाईम्स