असोज २२ । कामका लागि खाडी देश पुगेका नेपाली महिला चरम यातनाका कारण आत्महत्या गर्ने गरेको राष्ट्र संघिय संस्थाले जनाएको छ । घरेलु महिला कामदारका रुपमा खाडीमा काम गर्न गएका मध्ये पछिल्लो डेढ वर्षको अवधिमा मात्र , ८२ जना नेपाली महिलाले आत्महत्या गरेका छन् ।
महिलासम्बन्धी काम गर्ने राष्ट्रसंघीय निकाय युएन वीमनका अनुसार सन् २०११ जनवरी यता खाडी क्षेत्रमा कार्यरत ८२ जना नेपाली महिलाले आत्महत्या गरेका छन् । कतार, साउदी अरेबिया, युएई र कुवेतमा गरेको अध्ययनबाट आत्महत्याको दर बारे जानकारी आएको युएन वीमनकी दक्षिण एसिया संयोजक सरु जोशीले बताउनुभयो । युएन वुमनका अनुसार १८ महिनाको अबधिमा २ हजार ८ सय २२ नेपाली महिला कामदारलाई दयनीय अबस्थामा उद्धार गरिएको छ ।खास गरि अबिबाहित नेपाली चेलीहरुमाथि रोजगारदाताबाट यौन शोषण हुने दर निकै उच्च रहेको अध्ययनमा देखिएको छ । यो अबधिमा २५ जना नेपाली चेलीहरु रोजगारदाताको यौनशोषणपछि गर्भ बोकेर घर फकिर्एका छन् । खाडी क्षेत्रमा करिव साढे दुई लाख नेपाली महिला घरेलु कामदारका रुपमा कार्यरत रहेको अनुमान गरिएको छ । बैदेशिक रोजगार बिभागले भने खाडी क्षेत्रमा ५७ हजार नेपाली महिला कामदार रहेको बताएको छ । सन् २००७ यता मात्र बिभागले महिला कामदारको तथ्याङक राख्न थालेको हो ।
|
|
