रोगव्याधी नलागोस् भनेर पूजा गर्दा उल्टै बिरामी

 १९ चैत, काठमाडौं । गाउँमा रोगब्याधीको प्रकोप नफैलियोस् भन्दै पूजा गरेका नुवाकोट सूर्यमति ४ चौखुडाका गाउँले प्रसाद खाने बित्तिकै बिरामी भएका छन् । गएको शनिबार शनिश्चरे पूजा गरेपछि पूजाको प्रसाद र भोज खाएका ८६ जना गाउँले बिरामी परेका हुन् । गाउँले बिरामी भएको खबर पाए लगत्तै जिल्ला अस्पतालका मेडिकल अधिकृत डा. दीपेन्द्र पाण्डे नेतृत्वको टोलीले उपचार गरेको छ । ‘२३ जना बिरामी गएराति अस्पताल पुगेपछि हामीले गाउँमा झाडापखाला फैलिएको थाहा पायौं’ डा. पाण्डेले  भन्नुभयो-’बिहान हामी १० जनाको टोली गाउँमा पुगेर उपचार गर्यौं, सबै बिरामी खतरामुक्त छन् ।’ उहाँका अनुसार एकसय ६ जनाले प्रसाद खाएकोमा ८६ जनामा झाडापखाला देखिएको थियो । ‘दाल र अचार खानेहरु बिरामी भएको पाइयो’ डा. पाण्डेले भन्नुभयो-’दाल या अचारमा केही खराबी भएको हुनुपर्छ, फूड पोइजनको आशंका गरेका छौं हामीले ।’ बिरामीहरुमा सुधार आउन थालेको उहाँले बताउनुभयो । बिरामी हुनेमा अधिकांश महिला, बालबालिका र बृद्धबृद्धा छन् रोगब्याधी र भूतप्रेतले नछोओस् भन्ने कामना गर्दै गाउँलेले शनिबार गाउँकै खोला छेउमा शनिश्चरे पूजा गरेका थिए । पूजापछि रमाइलो गरेर सबैले भोज र प्रसादी खाएका थिए । राईवस्ती भएकाले भोजमा मदिरा लगायतका अरु खाद्य पदार्थ थियो ।