सूचना तथा सञ्चार मन्त्रालयले पनि कहिलेकाँही उदेकै गर्छ । नेपाली सेनाको पोशाकमा फिल्म बनाएको भन्दै मनोज पण्डितको ‘बधशाला’ माथि मन्त्रालयले प्रतिबन्ध लगायो । तर, त्यस्तै सैनिक पोशाक प्रयोग गरेका पप्पुलाई भने चलचित्र विकास बोर्डको अध्यक्षमा नियुक्त गरिएको छ । अब ‘बधशाला’ को सैनिक पोशाक फुकाल्ने जिम्मेवारी सैनिक पोशाकधारी पप्पुको काँधमा सरेको छ ।सञ्चार मन्त्रालयको माघ ७ गतेको पत्रअनुसार बधशालालाई इजाजत दिने/नदिने अधिकार विकास बोर्डका अध्यक्ष धर्मेन्द्र मर्वैत्ता -पप्पु) का हातमा पुगेको छ । तर, पप्पुले यसअघि नै नेपाली सेनाको पोशाक प्रयोग गरेर भोजपुरी चलचित्रमा बन्दुक बोकिसकेका छन् । आफ्नो सैन्य पोशाकको चलचित्र सदर हुने तर, पण्डितलाई यही कारण देखाएर इजाजत नदिन पप्पुलाई नैतिकरुपमा गाह्रो छ । सैनिक पोशाक प्रयोग गर्न पप्पुले पाउने तर पण्डितले नपाउने आदेश सञ्चार मन्त्रालयले किन गर्यो होला ? यो प्रश्नमा बधशालाका निर्देशक पण्डित भन्छन्- ‘पोशाकका कारणले बधशालामाथि प्रतिबन्ध लगाइएको हैन, कारण अर्कै छ । चलचित्रले विगतमा तत्कालीन शाही सेनाले दिएको यातनाको पोल खोलेकोमा प्रतिबन्ध लगाइएको हो, पोशाक त बाहनामात्रै हो ।’ ‘भ्रष्टाचारसम्बन्धी चलचित्र बनाउँदा सर्जकले भ्रष्टाचारीसँग अनुमति माग्दैन । हालै एयरपोर्टमा अध्यागमन विभागका कर्मचारीबाट लुटिएकी युवतीको विषयमा चलचित्र बनाउँदा अध्यागमनका कर्मचारीसँग अनुमति बनाएर चलचित्र बनाइँदैन ।’- पण्डितले भने । आफूले नेपाली सेना लोकतान्त्रिक भैसकेको भन्ने ठानेको र विगतका कमजोरीप्रति आत्मालोचना गर्छ भन्ने ठानेको तर, नेपाली सेना नबदलिएको आफूले अनूभूति गरेको पण्डितको तर्क छ । रक्षा मन्त्रालयले पठाएको पत्रअनुसार माघ ७ गते सूचना तथा सञ्चार मन्त्रालयले ‘बधशाला’ लाई इजाजतपत्र नदिन चलचित्र विकास बोर्डलाई निर्देशन दिएको छ । तर, बधशालालाई सैन्य पोशाकका कारण इजाजत नदिने ठाउँमा भने आफैंले सैनिक पोशाक लागाइसकेका धर्मेन्द्र मर्वैत्ता पप्पु बिराजमान भएका छन् । हेरौं, सैन्य पोशाकधारी पप्पुले अब के गर्छन् ।
|
|
