१८ असोज, बुटवल । नेकपा- माओवादीका सचिव नेत्र विक्रम चन्द 'विप्लव'ले एकिकृत नेकपा (माओवादी)का अध्यक्ष पुष्पकमल दाहाल 'प्रचण्ड' र पार्टी उपाध्यक्ष तथा प्रधानमन्त्री बाबुराम भट्टराई राष्ट्रघाती भएको आरोप लगाएका छन् । राष्ट्रिय जनस्वयमसेवक प्रथम अबद्य भेलालाई आज बुटवलमा सम्बोधन गर्दै नेता चन्दले दश बर्षसम्म जनयुद्ध गरेर जनतालाई धोका दिएको भन्दै बा बुराम र प्रचण्ड धोकेबाज भएको बताए । विदेशी मालिकहरूको अगाडि लम्पसार परेर कांग्रेस-एमालेले भन्दा बढी राष्ट्रघाती सम्झौता गरेको आरोप लगाउँदै उनले प्रचण्ड र बाबुरामले बन्दुक बोकेर युद्ध लडेको जनतामाथी ठूलो घात गरेको आरोप लगाएका छन् । उनले प्रधानमन्त्री डा. बाबुराम भट्टराईले उत्पीडित महिला दलित र सर्वहारा वर्गमाथि अक्षम्य अपराध गरेको आरोप लगाउँदै सहमतिका नाममा जनमुक्ति सेनालाई विर्सजन गरिएको दावी गरेका छन् । उनले सहमितको नाममा किसान, दलित, सुकुम्बासी, दलित महिला र उत्पीडितको मुद्धा सम्बोधन नभए बन्दुक उठाउन समेत पछि नहट्ने चेतावनी दिएका छन् । चन्दलेतीन दलले मात्र गरेको सहमति मान्य नहुने बताउदै आफुहरूको सहमति बिना देशले निकास नपाउने जिकिर गरे । उनले नयाँ निर्वाचन, संविधानसभा पुर्नस्थापना कुनै पनि औचित्य नरहेको बताउदै सर्वपक्षिय छलफलले मात्रै देशलाई निकास दिने तर्कगरेका छन् । राष्ट्रिय स्वाधिनता र देशलाई बन्धकी राखेर वर्तमान सरकारले इतिहासमै सबैभन्दा ठूलो अपराध गरेको उनको भनाई छ । स्वाधिनता आन्दोलन गर्दा वर्तमान सरकारले कारवाही गर्ने निर्देशन दिनुले प्रधानमन्त्री भट्टराई भारत एजेन्ट भएको पुष्टि हुने उनको टिप्पणी छ । भारतीय गाडी नेपाल चल्न नदिने आफुहरुको आन्दोलनलाई सरकारले दवाउन खोजेको बताउदै प्रधानमन्त्रीलाई आफ्नै गाडीमा भारतीय नम्बर प्लेट राखेर गाडी चलाउन आग्रह गरे ।
|
|
