आजभन्दा ५ बर्ष अघिसम्म नेपालमा पारिवारिक सिरियलको वर्चस्व थियो । टेलिभिजनमा सबैभन्दा धेरै दर्शक यस्तै सिरियलले पाउने गर्थे । सिरियलमा अभिनय गर्ने कलाकारको क्रेज सिनेमाको नायकको भन्दा कम थिएन । परिचय, मुक्ति, प्रतिद्धन्दी, करुणा, गहना, संयोग जस्ता सिरियल आज पनि दर्शकको दिमागमा घुमिरहेका छन् ।तर परिचयसँगै ओरालो लागेका सिरियलको क्रेज आज हराएको छ । दर्शकमा यस्ता सिरियलप्रतिको चाहना र उत्सकुता शुन्यमा झरेको पाइन्छ । अहिले टेलिभिजनको पर्दामा विशेषगरी कमेडिको बाढि नै लागेको छ । तितो सत्य, मेरी बास्सै, जिरे खुर्सानी जस्ता हास्य सिरियलको क्रेज ह्वात्तै बढेको छ । विज्ञापनदाताहरु पनि यस्तै सिरियलमा पैसा लगानी गर्न इच्छुक देखिन्छन् । मिडिया हबका कार्यकारी निर्देशक सोम धिताल नेपालमा पारिवारिक सिरियल उठ्नै नसक्ने गरी धराशायी बनेको बताउँछन् । विशेषगरी कमेडी सिरियलको प्रभाव बढ्दा पारिवारिक सिरियल सुतेको उनको भनाइ छ । धितालले पारिवारिक सिरियलले भारतीय सिरियलको नक्कल गरेकाले पनि यस्तो अवस्था आएको बताए । उनले भने, ‘भारतीय सिरियलको नक्कल मात्र गर्ने तर उनीहरुको जस्तो गुणस्तर दिन नसक्दा दर्शकले नेपाली सिरियल मन पराउन छोडेका हुन् ।’नेपाली माटो र नेपालकै रहनसहन सुहाउँदा सिरियललाई बिर्सिएर विदेशीको नक्कल गर्दा नेपालमा पारिवारिक सिरियलप्रति दर्शकको चाहना र चासो घटेको विश्लेण गर्छन् सोम धिताल । यस्तै नेपाल टेलिभिजनले समेत यस्ता सिरियललाई प्राथमिकता नदिएको उनको भनाइ छ । सुपर प्राइम टाइममा कमेडी या राजनीतिक बहसका कार्यक्रम प्रशारण हुन थालेपछि सिरियलले राम्रो समय नपाएको धितालको भनाइ छ । उनले भने, ‘नर्मल समय पारिवारिक सिरियलका लागि छुट्टाइएकाले पनि यसको क्रेज हराउँदै गएको हो ।’ मिडिया हबमा अहिले पनि ५७ भन्दा बढी सिरियलहरु थुपि्रएर बसेका छन् । तर यसबारेमा न त नेपाल टेलिभिजनले सोचेको छ, न त विज्ञापनदाताले नै । कमेडी सिरियलको क्रेज घट्दै गएपछि के गर्ने भन्ने योजना न त नेपाली संचारमाध्यमसँग नै छ न त मिडिया हब जस्ता एजेन्सीहरुले नै गरेका छन् । सफल सिरियल ‘परिचय’ निर्देशन गरेका निर्देशक ऋषि लामिछाने नेपाल टेलिभिजनलाई पैसा र पावरले चलाएका कारण यस्तो अवस्था आएको बताउँछन् । उनले भने, ‘नेपाल टेलिभिजनले सिरियललाई उपेक्षा गर्दै समय नछुट्टाएका कारण यो क्षेत्र धराशायी बनेको हो ।’ सामान्य समयमा समेत टेलिभिजनको समय महङ्गो हुनु र एजेन्सीहरु सिरियललाई लगानी गर्न इच्छुक नहुने मुख्य कारण भएको लामिछानेको भनाई छ । नेपाल टेलिभिजनले सिरियलका लागि राम्रो समय छुट्टाइदिने हो भने आफुले अझै पनि उत्कृष्ट सिरियल बनाउन सक्ने दाबी उनको छ । मानवीय संवेदना बोकेका सिरियलहरुले दर्शकलाई चेतना समेत जगाउने काम गर्छन् । तर, यसको महत्व सरोकारवालाहरुले नबुझ्दा नेपालमा सिरियलको बजार ध्वस्त हुँदै छ ।
|
|
