कराची, असोज २३ (एजेन्सी) - पश्चिमाहरुको समर्थक भएको र अमेरिकी राष्ट्रपति बाराक ओबामालाई आफ्नो आदर्श भन्दै हिँडेको भन्दै पाकिस्तानी तालिबानका एक कार्यकर्ताले स्वात उपत्यकामा एक १४ वर्षकी स्कूले बालिकाको टाउकोमा गोली हानेका छन्। पाकिस्तानी तालिबानका प्रवक्ताले बेलायती समाचार एजेन्सी रोयटर्ससँग कुरा गर्दै आफ्ना कार्यकर्ताले मलाला युसुफजाईलाई गोली हानेको पुष्टि गरेका छन्।ती बालिकाले तालिबानको विरोधमा पनि आवाज उठाउँदै आएकी थिइन्। उनको टाउको र घाँटीमा गोली लागेको छ। स्कूल बसमा गोली हान्दा उनीसँगै रहेका दुई बालिका पनि घाइते भएका छन्।
बीबीसीको वेबसाइटमा नाम नखुलाई लेखेको ब्लगका कारण उनी अन्तर्राष्ट्रिय बाल शान्ति पुरस्कारका लागि समेत मनोनीत भएकी थिइन्। उनले पाकिस्तानको राष्ट्रिय शान्ति पुरस्कार समेत जितेकी थिइन्। अहिले उनी पेशावरको अस्पतालमा सिकिस्त छिन्। चिकित्सकहरुका अनुसार उनको टाउकोबाट गोली निकाल्न सकिएको छैन।
घाइते मलालालाई पेशावर अस्पताल लगिँदै। तस्बिर सौजन्यः जहान्जइब हक/ट्विटर - स्रोत नागरिक निउज
|
|
