नेपाली क्रिकेटरलाई नगर परिक्रमा गराईने

२५ वैशाख, काठमाण्डौं । विश्व क्रिकेट डिभिजन-३ जितेर आज स्वदेश र्फकदै गरेको नेपाली क्रिकेट टोलीलाई नगर परिक्रमा गराईने भएको छ । नेपालले बर्मुडामा भएको खेलमा उपाधि जित्नुका साथै विश्वकपको छनोट खेलमा सहभागी हुने मौका पाएको छ भने, एक स्थान माथि पुगेर डिभिजन-२ मा बढुवा भएको छ । बिहान ९ बजे त्रिभुवन विमानस्थल आइपुग्ने नेपाली टोलीलाई एयरपोर्टबाट गौशाला, रातोपुल, मैतिदेवी, डिल्लीबजरा, पुललीसडक, भृकुटिमण्डव, सहिद गेट हुँदै राष्ट्रिय खेलकुद परिषद पुर्‍याउने तयारी नेपाल क्रिकेट संघले गरेको छ । टोलीलाई पञ्चकन्याको स्वागत सहित बाजागाजाका साथ नगर परिक्रमा गराईने तयारी भएको क्रिकेटसंघका किरण राणाले जानकारी दिनुभयो ।

इतिहास रच्दै नेपाली क्रिकेटर (फाइनलमा युगाण्डालाई हरायो) भिडियो खबर

  प्रतियोगिताको फाइनलमा नेपालले युगाण्डालाई ५ विकेटले हराएको छ । बर्मुडाको सेन्ट डेभिडमा युगाण्डाले टस जितेर ब्याटिंग रोजेपछि युगाण्डाले १५१ रन बनायो । १५२ रनको लक्ष्य नेपालले ३९.२ ओभर खेलेर ५ विकेटको क्षतिमा पूरा गरेको हो । उकालो लाग्दै गरेकोनेपाली क्रिकेट टिम पहिलो पटक आइसीसी डिभिजन टू मा प्रवेश गरेको छ ।

 

बर्मुडा चम्केपछी नेपाल विश्वकपको नजिक

 २२ वैशाख, काठमाडौं । नेपालले आईसीसी वल्र्ड कप लिग डिभिजन २ मा वढुवा भएको छ । यससँगै नेपालले वल्र्डकप छनोट खेल्न पाउने भएको छ । शनिबार राति भएको खेलमा इटलीलाई ८ विकेटले हराउँदा अमेरिका बर्मुडासँग ५ विकेटले पराजित भयो र नेपाल रनरेटमा अघि रहँदै डिभिजन २ मा फड्को मार्न सफल भयो । नेपाल र अमेरिकाको समान ६ अंक भएपनि रनरेटमा नेपाल अघि रह्यो । ८ अंकका साथ शीर्ष स्थानमा रहेको युगाण्डा पनि शीर्ष स्थानमा उक्लिएको छ भने अमेरिका र बर्मुडा डिभिजन थ्रीमा रहँदा इटली र ओमान डिभिजन ४ मा घटुवा भएका छन् । इटलीले प्रस्तुत गरेको १ सय २८ रनको लक्ष्य नेपालले १४ दशमलव ५ ओभरमा मात्र २ विकेटको क्षतिमा भेट्टायो । पहिलो विकेटका लागि प्रदिप ऐरीसँग ८७ रनको साझेदारी गरेका ओपनर सुवास खकुरेल पहिलो विकेटका रुपमा व्यक्तिगत ४७ रनमा आउट भए । कप्तान पारस खड्का २२ रनमा पभेलियन फर्किए । प्रदिप ४२ र ज्ञानेन्द्र मल्ल १० रनमा अविजित रहे । यसअघि पहिले व्याटिङ गरेको इटलीले ५० ओभरमा ९ विकेट गुएमार १ सय २७ रन बनाएको थियो । उसलाई सस्तैमा समेट्ने क्रममा रहुल विश्वकर्मा र संजम रेग्मीले समान ३÷३ विकेट लिए भने शक्ति गौचनले २ र बसन्त रेग्मीले १ विकेट लिए ।

आइसीसी वल्र्ड डिभिजन थ्रीमा आज नेपाल र बर्मुडा भिड्ने

 १८ वैशाख, काठमाण्डौं । आइसीसी वल्र्ड क्रिकेट लिग डिभिजन थ्रीमा नेपाल आज आयोजक बर्मुडासंग खेल्दैछ । खेल नेपाली समय अनुसार बेलुका सवा ७ बजे बर्मुडाको सेन्ट डेभिडस क्रिकेट क्लबको मैदानमा हुनेछ । लगातार दुई खेल हारेसंगै नेपालको डिभिजन २ मा पुग्ने यात्रा कठिन बनेको छ । शीर्ष २ मा पुग्ने सम्भावना जिवितै राख्न नेपालले आजको खेल जित्नै पर्ने दबाव छ ।

 शीर्ष दुईमा पर्न नसकेको अवस्थामा डिभिजन ३ मा कायमै रहनका लागि पनि नेपालका लागि आजको खेल गर या मरको हुनेछ । नेपाल र बर्मुडा एकदिवसीय खेलमा पहिलो पटक भिड्न लागेका हुन् । ट्वान्टी ट्वान्टीमा गत वर्ष भएको भेटमा नेपालले बर्मुडालाई हराएको थियो ।

नेपालको निराशाजनक प्रदर्शन, डिभिजन २ को यात्रा कठिन बन्दै

 १७ बैशाख, काठमाण्डौ । बर्मुडामा जारी आईसीसी वल्र्ड क्रिकेट लिग डिभिजन थ्रीमा लगातार दोस्रो हार व्यहोरेको छ । गएराति भएको आफ्नो खेलमा नेपाल युगाण्डासंग ६ विकेटले पराजित भएको हो । टस जितेर पहिले व्याटिङ गरेको नेपालले ४४.२ ओभरमा सवै विकेट गुमाएर १ सय १६ रन मात्र बनायो । नेपालका लागि प्रदिप ऐरीले २४, शक्ति गौचनले २१, पृथु बास्कोटा तथा विनोद भण्डारीले समान १८ र ज्ञानेन्द्र मल्लले १० रन बनाउनु बाहेक अन्यले दोहोरो अंकमा रन बनाउन सकेनन् । अमृत भट्टराई र शरद भेष्वाकर खाता नै नखोली पेविलियन फर्किए । १ सय १७ को सामान्य लक्ष्य पछ्याएको युगाण्डाले २७ ओभर खेल्दै ४ विकेटको क्षेतिमा लक्ष्य भेट्टायो । उसका लागि रोगार मुकासले अविजित ४९ तथा बेन्जामिन मुसोकेले २२ रनको योगदान दिएका थिए ।